गोरखाको शहीद लखन गाउँपालिका–७ स्थित ढुङ्गागाढे भञ्ज्याङ नजिकै आइतबार रातिको भीषण वर्षाले सडक भासिँदा ढुङ्गागाढे–खाब्दी भञ्ज्याङ सडकखण्डमा यातायात सेवा पूर्ण रूपमा अवरुद्ध भएको छ। वडाध्यक्ष शरण श्रेष्ठका अनुसार, गत वर्ष वर्षाले सामान्य क्षति पुर्याएको यो सडक समयमै मर्मत नहुँदा अहिलेको वर्षाले थप क्षति पुर्याएको हो। गत बर्खादेखि नै जोखिमपूर्ण अवस्थामा रहेको यो सडकमा हाल चारपाङ्ग्रे सवारीसाधन मात्र नभई साना सवारीसाधनसमेत सञ्चालन हुनसक्ने अवस्था छैन। शहीद लखन गाउँपालिकाको मुख्य प्रवेशद्वारका रूपमा रहेको यो सडक अवरुद्ध हुँदा यात्रुहरू समस्यामा परेका छन्, भने मोटरसाइकल र पैदलयात्रीहरूले जोखिम मोल्नुपर्ने बाध्यता छ। सडक पूर्वाधार विकास कार्यालयले शनिबारदेखि पुनर्निर्माणको काम शुरू गरे पनि वर्षाका कारण निर्माण कार्य प्रभावित भएको छ।
