गत महिना इजरायलले इरानमाथि गरेको एक आक्रमणमा इरानी राष्ट्रपति मसउद पेजेश्कियान घाइते भएका थिए भन्ने दाबी इरानको रिभोलुसनरी गार्डसँग निकट मानिने फार्स समाचार एजेन्सीले गरेको छ।
एजेन्सीका अनुसार, इरानले यस घटनामा इजरायली एजेन्टहरूको घुसपैठ भएको हुन सक्ने आशंकामा हाल आन्तरिक अनुसन्धान अघि बढाएको छ। फार्सलाई उद्धृत गर्दै बीबीसीले जनाएको छ कि जुन १६ मा इजरायलले तेहरानस्थित एउटा गोप्य भूमिगत केन्द्रमा छ वटा बम आक्रमण गरेको थियो।
त्यसबेला राष्ट्रपति पेजेश्कियान सर्वोच्च राष्ट्रिय सुरक्षा परिषद्को आपतकालीन बैठकमा सहभागी थिए। यो परिषद् इरानमा सर्वोच्च नेता आयतोल्लाह अली खामेनीपछि सबैभन्दा ठूलो निर्णयात्मक निकाय मानिन्छ।
उक्त आक्रमणपछि राष्ट्रपति पेजेश्कियान र अन्य सदस्यहरू आपतकालीन सुरुङमार्फत बाहिर निस्कने क्रममा खुट्टामा सामान्य चोट लागेको बताइएको छ।
तर बीबीसीले फार्सको यो रिपोर्ट स्वतन्त्र रूपमा पुष्टि गर्न सकेको छैन। इजरायलले पनि यस विषयमा हालसम्म कुनै सार्वजनिक टिप्पणी गरेको छैन। यद्यपि इरानले सम्भावित घुसपैठसम्बन्धी आन्तरिक अनुसन्धान गरिरहेको छ।
इरानी राष्ट्रपतिको आरोप: “इजरायलले हत्या प्रयास गर्यो”
सामाजिक सञ्जालमा सार्वजनिक भएका केही भिडियोहरूमा उत्तर–पश्चिमी तेहरानको पहाडी क्षेत्रमा बारम्बार आक्रमण भएको देखिन्छ। पछि खुलासा भएको अनुसार, ती आक्रमणहरू राष्ट्रपति र शीर्ष सुरक्षा अधिकारीहरू उपस्थित रहेको गोप्य भूमिगत केन्द्रलाई लक्षित थिए।
फार्स एजेन्सीका अनुसार, इजरायली आक्रमणले सो केन्द्रको प्रवेश र निकासका सबै ६ बिन्दुहरू, साथै भेन्टिलेसन प्रणालीलाई समेत ध्वस्त बनाएको थियो। साथै, केन्द्रको विद्युत आपूर्ति पनि काटिएको थियो। तथापि राष्ट्रपति पेजेश्कियान सुरक्षित रूपमा बाहिर निस्कन सफल भएका थिए।
गत हप्ता, राष्ट्रपति पेजेश्कियानले इजरायलले आफ्नो हत्या प्रयास गरेको सार्वजनिक रूपमा आरोप लगाएका थिए।
बीबीसीले उल्लेख गरेअनुसार, अझै धेरै प्रश्नहरू अनुत्तरित छन्—जस्तै इजरायलले इरानका शीर्ष अधिकारीहरूको अवस्थिति र गोप्य सुविधाहरूको विवरण कसरी हासिल गर्यो?
संयुक्त अमेरिकी–इजरायली आक्रमण
जुन १३ मा इजरायलले इरानका आणविक र सैन्य स्थलहरूमा आकस्मिक आक्रमण गरेको थियो। त्यसपछि जुन २२ मा अमेरिकाको वायुसेना र नौसेनाले तीनवटा इरानी आणविक केन्द्रहरूमा हवाई तथा मिसाइल आक्रमण गरेका थिए।
अमेरिकी राष्ट्रपति डोनाल्ड ट्रम्पले ती आक्रमणबाट ती केन्द्रहरू “पूर्ण रूपमा ध्वस्त” भएको दाबी गरेका थिए। यद्यपि, यसको पनि स्वतन्त्र पुष्टि भइसकेको छैन।
इजरायल र अमेरिकाले इरानलाई आणविक हतियार बनाउनबाट रोक्न उक्त आक्रमणहरू गरेको बताएका छन्। तर इरानले भने आफूले आणविक हतियार निर्माण नगरेको र युरेनियम संवर्धन शान्तिपूर्ण उद्देश्यका लागि मात्र गरिएको दाबी गर्दै आएको छ।
