पोखरा । तमु प्ये ल्हु संघ, केन्द्रीय युवा समिति पोखराको आयोजनामा दोस्रो टीपीएलएस (TPLS) अन्तर तमु समाज ६-ए-साइड एमेच्योर फुटसल प्रतियोगिता–२०८३ हुने भएको छ।
पोखरामा रहेका विभिन्न तमु समाजहरूबीच आपसी सद्भाव, भाइचारा र एकता अभिवृद्धि गर्ने उद्देश्यले प्रतियोगिता आयोजना गर्न लागिएको हो। प्रतियोगिता आगामी असोज २४ र २५ गते पोखरा रङ्गशालास्थित कभर्ड हलमा सञ्चालन हुने आयोजकले जनाएको छ।
तमु समुदायका युवाहरूलाई खेलकुदका माध्यमबाट एकताबद्ध गर्दै उनीहरूमा रहेको खेल प्रतिभाको पहिचान र विकास गर्ने उद्देश्यसमेत प्रतियोगिताले लिएको छ। साथै, युवाहरूमा अनुशासन, मित्रता, सहकार्य र स्वस्थ प्रतिस्पर्धाको भावना विकास गर्न प्रतियोगिताले महत्त्वपूर्ण भूमिका खेल्ने आयोजकको विश्वास छ।
प्रतियोगिताको विजेता टोलीले नगद ७० हजार रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेता टोलीले नगद ४० हजार रुपैयाँसहित ट्रफी, मेडल र प्रमाणपत्र प्राप्त गर्नेछ।
६-ए-साइड एमेच्योर फुटसल स्वरूपमा सञ्चालन हुने प्रतियोगितामा सहभागी हुन इच्छुक टोलीका लागि पाँच हजार पाँच सय रुपैयाँ दर्ता शुल्क निर्धारण गरिएको छ।
प्रतियोगितामा सहभागिताका लागि पोखरामा रहेका सम्पूर्ण तमु समाज तथा खेलप्रेमी युवाहरूलाई आयोजकले आह्वान गरेको छ। खेलकुदलाई प्रतिस्पर्धामा मात्र सीमित नराखी समुदायबीचको आपसी सम्बन्ध सुदृढ बनाउने र युवा पुस्तालाई सामाजिक एकताको सूत्रमा जोड्ने माध्यमका रूपमा प्रतियोगितालाई अघि बढाइएको आयोजकले जनाएको छ।
प्रतियोगितासम्बन्धी थप जानकारी तथा टोली दर्ताका लागि मनोज गुरुङलाई ९७१४०२३४७२ र सुजन गुरुङलाई ९८६६०५०११४ मा सम्पर्क गर्न सकिनेछ।
तमु समुदायका युवाहरूबीच खेलकौशल प्रदर्शन, आपसी परिचय, मित्रता र भाइचाराको सम्बन्ध विस्तार गर्ने अवसरका रूपमा प्रतियोगिता आयोजना गर्न लागिएको आयोजक तमु प्ये ल्हु संघ, केन्द्रीय युवा समिति पोखराले जनाएको छ।
