सर्भियाका राष्ट्रपति अलेक्जेन्डर बुचिचको राजीनामा माग्दै राजधानी बेलग्रेडमा विद्यार्थी नेतृत्वको प्रदर्शन चर्किएको छ। प्रदर्शनकारीहरूले बुचिचको शासन अन्त्य गर्न र समयअगावै निर्वाचन गराउन माग गरेका छन्। बीबीसीका अनुसार करिब १ लाख ४० हजार मानिस सहभागी यो प्रदर्शन पछिल्ला महिनाहरूमा सर्भियामा भएको सबैभन्दा ठूलो प्रदर्शन हो।
प्रदर्शनका क्रममा प्रहरीसँग झडप भएको छ। स्थिति नियन्त्रणमा लिन प्रहरीले अश्रुग्यास प्रहार गरेको छ भने केही प्रदर्शनकारीलाई नियन्त्रणमा लिएको छ। राष्ट्रपति बुचिचले प्रदर्शनकारीहरूमाथि देशलाई अस्थिर बनाउन खोजेको र विदेशी शक्तिको इशारामा चलेको आरोप लगाएका छन्।
राष्ट्रपति बुचिच सन् २०१४ देखि २०१७ सम्म सर्भियाको प्रधानमन्त्री थिए र सन् २०१७ मे ३१ देखि राष्ट्रपति पदमा छन्। हाल उनको दोस्रो कार्यकाल चलिरहेको छ। विगत १२ वर्षदेखि सर्भियाको शासन सत्तामा रहेका उनको नेतृत्वविरुद्ध अहिले व्यापक असन्तुष्टि देखिएको छ।
आन्दोलनको कारण के हो?
सर्भियामा हाल चर्किएको आन्दोलनको प्रमुख कारण सन् २०२४ नोभेम्बरमा नोवी साद रेल स्टेसनमा भएको दुर्घटना हो। रेल स्टेसनको छाना भत्किँदा कम्तीमा १५ जनाको मृत्यु भएको थियो। यो दुर्घटना सरकारी भ्रष्टाचार र लापरबाहीको परिणाम भएको भन्दै जनमानसमा व्यापक आक्रोश फैलिएको छ।
उक्त दुर्घटनापछि विद्यार्थीहरूले देशव्यापी आन्दोलन सुरु गरेका थिए। पछि शिक्षक, कानुन व्यवसायी, यातायात कर्मचारी, कृषि मजदुर र नागरिक समाजका समूहहरूले पनि यो आन्दोलनलाई समर्थन गरे। यो आन्दोलनले सर्भियामा लोकतन्त्र र कानुनी शासन पुनर्स्थापना गर्ने महत्त्वपूर्ण मोडको रूपमा अन्तर्राष्ट्रिय सञ्चारमाध्यमहरूले विश्लेषण गरेका छन्।
