काठमाडौँ । नेपाल उद्योग वाणिज्य महासंघले देशभर भएको आन्दोलन र प्रदर्शनका क्रममा भएको जनधन, उद्योग, कार्यालय र व्यवसायिक सम्पत्तिमा क्षति प्रति गहिरो दुःख व्यक्त गरेको छ। महासंघले ज्यान गुमाउने व्यक्तिहरूको परिवारप्रति समवेदना व्यक्त गर्दै घाइतेहरूको शीघ्र स्वास्थ्य लाभको कामना गरेको छ।
महासंघले देशभर निर्वाध पेशा र व्यवसाय गर्न सकिने वातावरण सिर्जना गर्न आह्वान गर्दै, निषेधाज्ञा र कर्फ्यूको समयमा अत्यावश्यक सेवा, खाद्यान्न, औषधि, पेट्रोलियम, पानी, फलफूल र तरकारीको आवतजावत सहज गर्न आग्रह गरेको छ। साथै, निजी क्षेत्रले अर्थतन्त्र, रोजगारी र राजश्वमा ठूलो योगदान गर्ने हुँदा यसको सुरक्षामा सबैको ध्यानाकर्षण आवश्यक रहेको महासंघले जोड दिएको छ।
महासंघले व्यवसायिक र व्यक्तिगत सम्पत्तिमा भविष्यमा कुनै पनि प्रकारको आक्रमण नहुने सुनिश्चितता, गुणस्तरीय सामानको नियमित आपूर्ति, सुरक्षा समितिसँग सहकार्य, र व्यवसायिक गतिविधि निर्वाध सञ्चालनका लागि आवश्यक वातावरणको निर्माणमा सरकार र स्थानीय निकायसँग सहकार्य गर्न आग्रह गरेको छ।
