कैलाली कारागारमा शुक्रबार राति भएको झडपमा घाइते भएका एक जनालाई थप उपचारका लागि काठमाडौं पठाइएको छ।
गम्भीर घाइते गोदावरी नगरपालिका–२ का आयुश भट्टलाई नेपाली सेनाको स्काई ट्रकमार्फत काठमाडौं लगिएको हो। यसअघि सो झडपमा धनगढी–४ का भरत चौधरीको मृत्यु भएको थियो भने ४७ जना घाइते भएका थिए।
शनिबार दिउँसो पनि कारागारको अवस्था असामान्य बनेको थियो। केही समयका लागि कैदीहरूले कारागार नियन्त्रणमा लिएपछि अवस्था नियन्त्रणमा ल्याउन सुरक्षाकर्मीले निकै प्रयास गर्नुपरेको थियो।
घटनाबारे छानबिन गर्न सहायक प्रमुख जिल्ला अधिकारी किरण जोशीको संयोजकत्वमा पाँच सदस्यीय समिति गठन गरिएको छ। समितिलाई १० दिनभित्र प्रतिवेदन पेस गर्ने कार्यादेश दिइएको छ।
घाइतेहरूको विभिन्न स्वास्थ्य संस्थामा उपचार भइरहेको छ। यसबारे सुरक्षा निकायका प्रमुखहरूसँग गृहमन्त्री रशेम लेखकले पनि छलफल गरेका छन्।
