सशस्त्र प्रहरीले कालीगण्डकी नदीमा आमा–छोरा बेपत्ता भएको आशंकामा खोजी कार्य जारी राखेको छ। साउन २१ गते साँझदेखि बेपत्ता भएका उनीहरूको खोजीमा सशस्त्र प्रहरी खटिएको सशस्त्र प्रहरी बलका सहप्रवक्ता डिएसपी शैलेन्द्र थापाले जानकारी दिए।
थापाका अनुसार स्याङ्जाको गल्याङ नगरपालिका–५, सेतिवेणीस्थित कालीगण्डकी नदी किनारको प्रतिक्षालयमा महिलाले प्रयोग गर्ने झोला, चप्पल, मोबाइल फोन र बच्चाको जुत्ता फेला परेको थियो। ती सामग्री कालीगण्डकी गाउँपालिका–४, बिर्घा बस्ने २७ वर्षीया श्यामकला पाण्डे र उनका ६ वर्षीय छोरा अर्पित पाण्डेको भएको खुलेको छ।
‘उनीहरू दुवै जना सम्पर्कमा नरहेकाले कालीगण्डकी नदीमा बेपत्ता भएको हुन सक्ने आशंकामा बिहीबार बिहानैदेखि सशस्त्र प्रहरी बल नेपाल ३० नम्बर गुल्म स्याङजाबाट सशस्त्र प्रहरी निरीक्षकको कमाण्डमा सुरक्षाफौज परिचालन गरी खोजी कार्य सुरु गरिएको हो,’ थापाले भने।
बेपत्ता आमा–छोराको खोजीका लागि पोखराबाट गोताखोर टोली समेत लैजाने तयारी गरिएको उनले जानकारी दिए।
