बागमती प्रदेशका मुख्यमन्त्री बहादुर सिंह लामाले तीन मन्त्री नियुक्त गरेका छन्। उनले गोविन्द लम्साल, माया श्रेष्ठ र गीता गुरुङलाई मन्त्री पदमा नियुक्त गरेका हुन्।
गोविन्द लम्साललाई आन्तरिक मामिला तथा कानुन मन्त्रालयको जिम्मेवारी दिइएको छ। माया श्रेष्ठ र गीता गुरुङको जिम्मेवारी भने हालसम्म तोकिएको छैन।
बागमती प्रदेशमा नेपाली कांग्रेसले सम्हालिरहेका पाँच मन्त्रालय मन्त्रीविहीन थिए। लम्साललाई मन्त्री नियुक्त गरेसँगै अझै युवा तथा खेलकुद, संस्कृति तथा पर्यटन, खानेपानी, ऊर्जा तथा सिंचाइ, र सहकारी तथा गरिबी निवारण मन्त्रालयहरू नेतृत्वविहीन छन्।
यसअघि ९ साउनमा चार जना र १३ साउनमा एक जना गरी पाँच मन्त्रीहरूले राजीनामा दिँदै मुख्यमन्त्री लामाविरुद्धको अविश्वास प्रस्तावमा हस्ताक्षर गरेका थिए।
