“रुपन्देही-३ उपचुनाव : लेखनाथ गैरेले गरे स्वतन्त्र उम्मेदवारी घोषणा”

रुपन्देही क्षेत्र नम्बर ३ मा आगामी कात्तिक १७ गते हुने प्रतिनिधिसभा उपनिर्वाचनका लागि बुटवल–१९, मोतिपुरका युवा लेखनाथ गैरेले स्वतन्त्र उम्मेदवारी घोषणा गरेका छन्। निर्वाचन आयोगले चुनावको मिति तोकेपछि पहिलो स्वतन्त्र उम्मेदवारको रूपमा गैरेले आइतबार पत्रकार सम्मेलनमार्फत उम्मेदवारी घोषणा गरे। उनले विद्यार्थी जीवनदेखि हालसम्म कुनै राजनीतिक दलको सदस्यता नलिएको र स्वतन्त्र रहेकाले उपनिर्वाचनमा स्वतन्त्र उम्मेदवारी दिने निर्णय गरेको बताए।

गैरेले राज्यका हरेक निकायमा चरम राजनीतिकरणका कारण नागरिकमा वितृष्णा बढेको उल्लेख गर्दै सुशासन, राम्रा कानून निर्माण, र बजेटको न्यायोचित तथा समानुपातिक वितरणका लागि स्वतन्त्र उम्मेदवारको जित आवश्यक रहेको तर्क प्रस्तुत गरे। २०५० सालदेखि बुटवलमा बस्दै आएका गैरेले आफू क्षेत्र नम्बर ३ को स्थानीय भएकाले यहाँका सबै वर्ग र समुदायका समस्याबारे जानकार रहेको बताए। उनले भने, “राजनीतिक दलहरूप्रति नागरिकमा वितृष्णा छ। जनभावनालाई सम्मान गर्दै स्वतन्त्र शब्दलाई न्याय दिन म उम्मेदवार बन्ने निर्णयमा पुगेको हुँ।”

गैरेका प्राथमिक एजेन्डा

गौतमबुद्ध अन्तर्राष्ट्रिय विमानस्थल पूर्ण क्षमतामा सञ्चालन
तिनाउ नदीमा स्थानीय तहले लगाउने ठेक्कामार्फत हुने करोडौंको ढुंगा, गिट्टी, बालुवा चोरी नियन्त्रण
खुला सीमाबाट हुने भन्सार छली र चोरी निकासी नियन्त्रण
मल, बीउ, र सिँचाइ समस्याको समाधान
पर्यटन प्रवर्द्धन र सुशासन स्थापना

अन्य दलका आकांक्षी

नेपाली कांग्रेस: बालकृष्ण खाँण, भरत शाह, प्रमोद यादव, रामचन्द्र ढकाल, रमेश खनाललगायतका नेताहरूको नाम चर्चामा छ। तर, नक्कली भुटानी शरणार्थी प्रकरणमा मुछिएका खाँणको उम्मेदवारी मुद्दाको किनारा लागेमा मात्र निश्चित हुने उनको निकट स्रोतले जनाएको छ।
नेकपा एमाले: पोलिटब्युरो सदस्य खिमलाल भट्टराई, व्यवसायी शशि पौडेल, पूर्वप्रदेश सांसद दधिराम न्यौपाने, केन्द्रीय निर्वाचन आयोग सदस्य भरत पोखरेल, र सिद्धार्थनगरका पूर्वमेयर हरि अधिकारी आकांक्षी छन्।
राष्ट्रिय प्रजातन्त्र पार्टी (राप्रपा): दीपक बोहराका छोराहरू क्याप्टेन गौरव बोहरा, प्रज्ज्वल बोहरा, नातिनी स्वाती थापा, र पूर्वमेयर सागरप्रताप राणा उम्मेदवार बन्ने चर्चामा छन्। गौरव र प्रज्ज्वल दाजुभाइ हुन्।
नेकपा माओवादी केन्द्र र विपक्षी गठबन्धन: नेकपा एकीकृत समाजवादीका महासचिव घनश्याम भुसाल र युवा नेता तथा अस्पताल व्यवसायी कमल भण्डारी उम्मेदवार बन्न सक्ने चर्चा छ।
राष्ट्रिय स्वतन्त्र पार्टी (रास्वपा): क्षेत्र नम्बर ३ का सभापति मधु अर्याल, सहकारी अभियान्ता ज्ञानु पौडेललगायतको नाम चर्चामा छ। कतिपयले राप्रपाका गौरव बोहरा रास्वपाबाट उम्मेदवार बन्न सक्ने अनुमान गरेका छन्।
नागरिक उन्मुक्ति पार्टी: संयुक्त लोकतान्त्रिक मधेशी मोर्चाका ७ दलको सहमतिमा उम्मेदवारी दिने भएको छ। रेशम चौधरी र धनिराम चौधरीको नाम चर्चामा छ।
अन्य स्वतन्त्र उम्मेदवार: काठमाडौंका मेयर बालेन शाहका समर्थक सागर ढकालले पनि स्वतन्त्र उम्मेदवारी दिने चर्चा छ। ढकालले गत आमनिर्वाचनमा डडेल्धुरामा नेपाली कांग्रेसका सभापति शेरबहादुर देउवासँग प्रतिस्पर्धा गरेका थिए।