बारा जिल्लाको अमलेखगञ्जस्थित जंगलमा बाघको आक्रमणबाट एक जना गोठालाको मृत्यु भएको छ । मकवानपुर मनहरी घर भई हाल बारा जितपुरसिमरा उपमहानगरपालिका–२१, अमलेखगञ्जमा बस्दै आएका वीरबहादुर थिङको बाख्रा चराउने काम गर्ने चन्द्रबहादुर भुलनको बाघको आक्रमणबाट मृत्यु भएको हो ।
५५ वर्षीय भुलन सोमबार चकरी जंगलमा बाख्रा चराउन गएका थिए । तर, साँझसम्म पनि घर नफर्किएपछि आफन्तहरूले प्रहरीलाई खबर गरेका थिए । जिल्ला प्रहरी कार्यालय बाराका प्रवक्ता डिएसपी विजय राज पण्डितका अनुसार मंगलबार बिहान साढे ७ बजे खोजतलास गर्दा भुलनको शव दक्षिणकाली सामुदायिक वनको खोल्सामा बाघले खाएको अवस्थामा फेला परेको थियो ।
प्रहरी र स्थानीय बासिन्दाको सहयोगमा शव भेटिएको हो । घटना सम्बन्धमा थप अनुसन्धान भइरहेको जनाइएको छ ।
