नेकपा बहुमत निकट अखिल क्रान्तिकारीले माइतीघर मण्डलामा आयोजना गरेको प्रदर्शनमा प्रहरीले हस्तक्षेप गरेको छ।
प्रदर्शनकारीहरूलाई नियन्त्रणमा लिन खोज्दा प्रहरी र विद्यार्थीबीच तनाव सिर्जना भएको हो। केही विद्यार्थीलाई प्रहरीले बलपूर्वक भ्यानमा राखेर नियन्त्रणमा लिएको छ। उनीहरूलाई मुक्त गराउने प्रयासमा प्रहरी र प्रदर्शनकारीबीच घम्साघम्सी भएको हो।
निःशुल्क, समान र वैज्ञानिक शिक्षासहित जनपक्षीय शिक्षा ऐन जारी गर्न दबाब दिन अखिल क्रान्तिकारीले आज बिहान १० बजे माइतीघरमा भेला भई प्रदर्शन गर्ने कार्यक्रम तय गरेको थियो।
पूर्वनिर्धारित कार्यक्रमअनुसार उनीहरू माइतीघरबाट नयाँ बानेश्वरसम्म प्रदर्शनमार्फत अगाडि बढ्ने योजना बनाएका थिए। तर, प्रहरी प्रशासनले माइतीघर क्षेत्रबाटै प्रदर्शनकारीलाई नियन्त्रणमा लिन सुरु गरेपछि अन्य विद्यार्थीहरूले विरोधमा नाराबाजी गरेका छन्।
