पत्रकार दिलभूषण पाठक साइबर अपराधको आरोपमा दायर मुद्दाका सिलसिलामा बिहीबार जिल्ला अदालत काठमाडौंमा उपस्थित भएका छन्। उनविरुद्ध अब थुनछेक बहस हुने भएको छ।
नेपाल प्रहरीको साइबर अपराध नियन्त्रण ब्यूरोले युट्युबमार्फत घृणा र द्वेष फैलाएको आरोपमा पाठकविरुद्ध १६ असारमा मुद्दा दायर गरेको थियो। हिल्टन होटलसँग सम्बन्धित एक भिडियोमा नेपाली कांग्रेसका सभापति शेरबहादुर देउवाका छोरा जयवीर देउवालाई जोडेर आपत्तिजनक सामग्री प्रकाशन गरेको भन्दै साइबर ब्यूरोमा उजुरी परेको थियो।
प्रहरीले पाठकमाथि अनुसन्धान अघि बढाउन पक्राउ पूर्जी जारी गरेको थियो। तर, उच्च अदालत पाटनले ५ असारमा उनलाई पक्राउ नगर्न आदेश जारी गरेपछि प्रहरीले पक्राउ नगरी मुद्दा दायर गरेको हो।
जिल्ला अदालतमा हुने थुनछेक बहसले पाठकको कानुनी प्रक्रियाको अर्को चरण निर्धारण गर्नेछ।
