२५ भदौ, धनगढी । जेनजी आन्दोलन चर्किएसँगै सुदूरपश्चिम प्रदेशका बाजुरा बाहेकका सबै जिल्ला कारागारका कैदीबन्दी भागेका छन्। मंगलबार प्रदर्शन नियन्त्रण बाहिर गएपछि प्रदर्शनकारीहरूले नै कारागारमा पुगेर कैदीहरूलाई मुक्त गराएका हुन्।
प्रदेश प्रहरीका अनुसार ८ वटा कारागारबाट करिब १४०० कैदीबन्दी फरार भएका छन्। कैलाली कारागारका ७०० कैदीमध्ये सबै भागेका छन् भने कञ्चनपुरमा ४७६ कैदीमध्ये २२ जना मात्र कारागारमै बसिरहेका छन्। बझाङमा पनि ८५ मध्ये ६६ जना भागेका छन्।
यसैबीच, पाँच जना भागेका कैदीलाई प्रहरीले पुनः नियन्त्रणमा लिन सफल भएको जनाएको छ। हाल बाजुराको कारागार मात्रै सुरक्षित रहेको छ भने बाँकी प्रायः जिल्ला कारागार खाली भएका छन्।
