आकर्षक तलबको प्रलोभन देखाई ग्रिस पठाइदिन्छु भन्दै ठगी गरेको आरोपमा एक जना पक्राउ परेका छन्।
पक्राउ पर्नेमा धादिङको नेत्रावती गाउँपालिका–५ घर भई हाल भक्तपुरको मध्यपुर थिमी नगरपालिका–९ बसोबास गर्ने २९ वर्षीय सुदीप सापकोटा रहेका छन्।
सापकोटाले ग्रिस पठाइदिन्छु भन्दै एक जना पीडितसँग २ लाख ४० हजार रुपैयाँ लिई सम्पर्कविहीन भएका थिए। पीडितले दिएको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले उनलाई शनिबार काठमाडौं महानगरपालिका–१५ बाट पक्राउ गरेको हो।
पक्राउ परेका सापकोटालाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।
