उदयपुरको चौदण्डीगढी–५ स्थित त्रियुगा नदीको भत्किएको पुलमुनि माछा मार्ने क्रममा बेपत्ता भएका एक युवकको शव फेला परेको छ।
चौदण्डीगढी–६, कालीखोला निवासी ३० वर्षीय सुरज राईको शव भेटिएको इलाका प्रहरी कार्यालय बेल्टारका प्रहरी निरीक्षक बबिन राईले जानकारी दिए।
उनका अनुसार, त्रियुगा नदीको भत्किएको पुलमुनि माछा मार्ने क्रममा बेपत्ता भएका राईको खोजी कार्य हिजोदेखि नै जारी थियो। सशस्त्र प्रहरीको टोलीले भत्किएको पुलनजिकैबाट शव फेला पारी निकालेको हो। शवलाई पोष्टमार्टमका लागि नगर अस्पताल, बेल्टार पठाइएको छ।
सोमबार सुरज राई आफ्ना साथीहरू प्रताप राई र सुरेश माझीसँगै नुहाउन गएका थिए। त्यही क्रममा माछा मार्ने प्रयास गर्दा उनी बेपत्ता भएका थिए।
