मोरङको कटहरी गाउँपालिकाका पूर्वअध्यक्ष तथा नेपाली कांग्रेसका स्थानीय नेता रामकुमार कामतविरुद्ध जिल्ला प्रशासन कार्यालय, मोरङमा मिटरब्याज (सूदखोरी) सम्बन्धी उजुरी परेको छ। तर सो उजुरीमाथि छलफल अघि नबढाउन कांग्रेस नेताहरूले प्रशासनमा दबाब दिइरहेको स्रोतले जनाएको छ।
रामकुमार कामत कटहरी गाउँपालिका कांग्रेस समितिका सभापति हुन्। उनी २०७४ सालको स्थानीय तह निर्वाचनमा गाउँपालिका अध्यक्षमा निर्वाचित भएका थिए।
मोरङका प्रमुख जिल्ला अधिकारी इन्द्रदेव यादवका अनुसार उजुरी परेपछि पीडित र कामत पक्षलाई पटक–पटक जिल्ला प्रशासन कार्यालयमा बोलाएर छलफल गराइएको थियो, तर सहमति जुट्न सकेको छैन।
आरोप : ८ लाख ऋणका लागि दुई करोडको जग्गा गुम्यो
पीडित रामवती राजवंशीले २०७१ सालमा ८ लाख रुपैयाँ ऋण लिन आफ्ना दुई वटा जग्गा अरूको नाममा पास गरेकी थिइन्। उनका अनुसार, ५ कठ्ठा जग्गा डम्बरकुमारी दाहालको नाममा रजिष्ट्रेसन पास गरी ५ लाख र ३ कठ्ठा जग्गा लिलावती यादवको नाममा पास गरी ३ लाख रुपैयाँ लिएकी थिइन्। उनले मूलधन (सावाँ) र ब्याज (ब्याज) दुवै रकम तिरे पनि आफ्नो जग्गा फिर्ता पाउन सकिनन्।
लिलावती यादवको नाममा पास भएको जग्गा सन्तोषकुमार मण्डलको नाम हुँदै रामकुमार कामतको नाममा पुगेको छ। यस्तै, डम्बरकुमारी दाहालको नाममा रहेको जग्गा समेत पछि कामतकै नाममा स्थानान्तरण भएको छ।
१० वर्षपछि उजुरी, तर कारबाहीमा ढिलाइ
आफ्नो जग्गा कामतको नाममा पुगेपछि रामवतीले फिर्ता माग्दा पनि कामतले नदिएको बताइएको छ। करिब २ करोड रुपैयाँ मूल्यको जग्गा फिर्ता माग्दा कामतले धम्कीसमेत दिएको आरोप छ। हाल पीडित परिवार अरूको जग्गामा बस्न बाध्य छ।
१० वर्षसम्म कुनै समाधान नपाएपछि पीडित परिवार २०८१ सालको जेठमा प्रहरी कार्यालय, मोरङ हुँदै जिल्ला प्रशासन कार्यालय पुगेको हो। प्रमुख जिल्ला अधिकारी यादवका अनुसार छलफल भए पनि टुंगो लागेको छैन।
प्रशासन स्रोतका अनुसार रामकुमार कामत कांग्रेस नेतामार्फत आफूविरुद्धको उजुरीमा कारबाही प्रक्रिया अघि नबढाउन दबाब दिइरहेका छन्। वैशाखमा भएको पछिल्लो छलफलमा कामतले आफूले पीडितसँग नभई अर्कैसँग कानुनी प्रक्रिया पूरा गरेर जग्गा खरिद गरेको दाबी गरेका थिए।
न्यायिक प्रक्रिया : जिल्ला अदालतमा हारे, उच्च अदालतमा मुद्दा विचाराधीन
आफ्नो जग्गा हडपिएको भन्दै रामवतीका छोरा इन्द्रकुमार राजवंशीले मोरङ जिल्ला अदालतमा लिखत बदरको माग गर्दै मुद्दा दायर गरेका थिए। तर उक्त मुद्दा जिल्लामा हारेका छन्। अहिले सो मुद्दा उच्च अदालत विराटनगरमा विचाराधीन छ।
रामवतीका अनुसार, उनले १० वर्षअघि प्रति कठ्ठा ८ लाख मूल्य पर्ने जग्गा धितो राखेकी थिइन्, जुन अहिले प्रति कठ्ठा २५ लाख पुगेको छ। उनले २०७४ को निर्वाचनअघि कामतले जग्गा फिर्ता दिने वाचा गरेको तर निर्वाचन जितेपछि त्यो वाचा तोडेको बताइन्। त्यसपछि उजुरी गर्न समेत नदिएको उनको भनाइ छ।
कामतको प्रतिक्रिया : ‘विचौलियाको षड्यन्त्र’
रामकुमार कामतले भने आफूविरुद्धको उजुरी मिटरब्याजसँग सम्बन्धित नभएको दाबी गरेका छन्। उनका अनुसार केही विचौलियाहरूले षड्यन्त्रपूर्वक आफूलाई फसाउन उजुरी दर्ता गराएका हुन्।
